تحميل كتاب ڕازی تەنیایی pdf

الكاتب: ئەحمەد هەردی

التقييم:4.00

تاريخ النشر: 1984

ژیان و ئەرکی ناخۆشی پەپوولەی ئارەزووی کوشتم
شەرابی جامی دڵداری، لە تافی لاوییا ڕشتم
تەمی ڕۆژانی پڕ مەینەت، وەھا تاریک و چڵکن بوو
نیگاری خۆشەویستی دڵ، پەری ئاسایی، تیا ون بوو
شەوی تەنیایی، ڕووناکیی چرای ئاواتی، خنکانم
دەسی ناکامی، ئاوازەی دەروونی کەیلی تاسانم
ئەوا ئێستا لەگەڵ زامی
دەروونی پڕ لە ناکامی
ئەپێوم چۆڵی سەرسامی

لە تەنیاییی شەوی ژینا، ئەنێم ھەنگاوی کوێرانە
نییە دەستێ دەرم بێنێ لەناو ئەم گۆڕە وێرانە
نییە جوانێ، سەری کاسم بنێمە سەر دڵی نەرمی
کە ھیلاکیی لەشم دەرکا خەوی سەر باوەشی گەرمی
ئەگێڕم چاوی بێتینم بە تاریکیی شەوا، سەرسام
نییە پرشنگی دوو چاوێ، کە ڕووناکی بکا، ڕێگام
بە غەیەری باڵی خەمناکی
شەوی پڕ ترس و سامناکی
نییە یەک تۆزە ڕووناکی

نییە تەنیا پەریزادێ، کە پاڵم پێوە نێ، نازی
کە بەھرەی سیس و ژاکاوم ببووژێنێتەوە، ڕازی
تریقەی ئەو، تەمی ئەم یەئسە ڕاماڵێ لەسەر چاوم
وەکوو لای لایە ژیری کا، دڵی منداڵی گریاوم
بەڵێ گوێ ھەڵئەخەم بێجگە لە خورپەی سست و لێدانی
دڵی پەستم، کە نووزەی دێ بە عاستەم ڕازی پەنھانی
نییە، ھەر دەنگی ھیچ نایێ
لە ھیچ شوێنێ، لە ھیچ لایێ
شەقەی باڵی شنەی بایێ