تحميل كتاب كوابيس مملة pdf
الكاتب: محمد ممدح خيرالله
التقييم:1.90
تاريخ النشر: 27-12-2015
كوابيس محمد خيرالله المملة.. أوجاع جيل بالعامية المصرية
صدر مؤخرًا عن دار الفيروز للنشر والترجمة والتوزيع، ديوان “كوابيس مملة” للكاتب الشاب محمد ممدوح خيرالله، مؤسس موقع ورقة الأدبي. والمتحدث الإعلامى السابق لحركة نشر الثقافية وعضو مجلس إدارة نادى الأدب السابق بقصر ثقافة كفرالشيخ، ومحاضر بالهيئة العامة لقصور الثقافة. وله مشاركات فعالة فى الوسط الثقافى تأتِ جميعها تحت مسمي مبادرات موقع ورقة.
ويعتبر هذا الديوان هو الديوان الثانى للكاتب بعد ديوانه الأول “ضحكة فردى” الصادر عن الهيئة العامة لقصور الثقافة فى العام 2011.
وقد اختار الكاتب لديوانه عنوان “كوابيس مملة” واستبدل كلمة (أشعار بالعامية المصرية) الى “أوجاع بالعامية المصرية” موضحًا أن الديوان هو مزيج من الوجع وحالات الفقد والإنتظار والملل، والحب بمفهومة الشامل للحبيبة الأم والأخت والوطن.
ديوان كوابيس مملة يأتى فى عدد 120 صفحة وعدد من القصائد كتبت جميعها فى الفترة ما بين 2010 حتى نهاية 2015.. حاول فيها الكاتب أن يعبر عن حالات مختلفة للعشق وتناول بفلسفة الشاعر أحداث حياتية شخصية تتشابه مع تفاصيل حياة هذا الجيل.
وإختار الشاعر هذه المقاطع المتنوعة والمتفرقة من ديوانه كوابيس مملة للترويج له عبر مواقع التواصل الإجتماعى..
1
كان لسه عمرى بيبتدي
والعالم المشهود قصادي
كان مجرد فجر نوره بيتفرد
على كل دار
أنا كنت حافظ جملتين إتنين.. وبس
في الدنيا جنة
والأخره مفيهاش إلا نار…
2
عارف أنت
لما تبقى الصورة واضحة
وأنت مش قابل… تشوفها
لما تبقى الناس سيرتها عنها جارحة
وأنت مقتول من سكوتها
لما يبقى مُباح فراقك
وأنت تايه في إشتياقك
نص عمرك
ولا عمرك كله ضايع..؟
لسه تايه..؟
هيا بتمارس حياتها…
3
كان لسه طفل بيتولد
سامع صراخه
إفتكرتك وإنتي بتقولي.. سامحني
أنا كنت شايفِك وقتها.. من غير ذنوب
مولوده طازه ودمعتك نفس البكاء
أنا نفسي من تاني أتولد
هانزل أعيط
لأجل أتوب…
4
ياريتك.. تصحى لثوانى
اقولك.. تصبحى على خير
وتبقى تنامى من تاني…
5
مجرد وجودي في حياتك
هزيمة
مجرد خروجك من القلب
إنتصار
مجرد رجوعي في قراري
تحدي
مجرد ما أقابلك
هاسيب لك حياتك
وأسيب لك حياتى
وأسيبك…
6
كانت الشمـس إتحادي
والنجوم والليل قصايدي
وإنتي اُم قصايدي والشعر وهوايتي
حب عمر بحاله
حلم..
فاكره غناويا لعنيكي ؟
لمستي لخدك وجسمك
فاكره إحساس السعادة ؟
أحلي حاجة إن إنتي فاكره
وإني مش فاكر زياده…
7
مش دايمًا لما بتوحشنا
بنسيب اللي شاغلنا ونمشيلك سكة
عشان نفتكرك…
ماهو أصل الحي.. زى الميت
لاتنين خارج حدوتة عقل الناس
الهم الأكبر، مش هم الصُحبة
ولا عمره يا صاحبي هايبقى لواحد زيي
كان زيك يوم
الهم الأكبر في بلدنا.. هم اللقمة
والعالم أصلاً دلوقتي
بيوزع في الملكوت الهم.. هدوم…
8
زى عقرب ساعة
كل ما بقرب ثواني..
تبعدك عني الدقايق
كل ما بقرب دقيقة..
تخطفك مني الساعات
فارجع أمشيلك خطاويا في ثبات
يسرقك بُكره اللي كان شايل حاجات
معرفتهاش…
9
ماسبتش غير.. صورة
وضحكة من قلبها
وفرحة مكسوره
ماسبتش غير.. جرحي
وقالت لى معذوره
وأنا برده صدقتها…
10
أخرتها ايه..؟
لو عمري كله.. عشتهولك
قلبي الضعيف.. وضبتهولك
أخرتها ايه..؟
هتعاندي برده العيشة فيه…
11
المشكلة..
مش دمعة نزلت فوق خدودها.. والسلام
المشكلة..
في هذا الوجع
إزاي قدر يغسل ذنوبها
بدون كلام…
12
بيوحشني الشتاء.. وياك
ويوحشني دفا حضنك
وبتعدي الفصول بالطول
وأنا مبطولش غير إسمك
عشان الدنيا دي بوشين
أنا موجود
وروحك.. وسط ناس تانيين…
13
زمان كان الفراق أصعب
زمان كان البكاء عنوان
وكان الحزن بيخيم على القلبين
لكنه الحب.. بات مغلوب
زمان كان الفراق بعذاب
ودلوقتي
مفيش قلبين تلاقي الحب دوبهم
زمان كان الفراق بحساب
ودلوقتي الفراق نكتة
يقولها اتنين لبعضيهم
وتعجبهم…
14
مش كل ناسك في البلد.. عابد
ولا كل صحبة تهون المشاوير
كل القلوب وشين.. وبتعاند
حزنك لقلبك
مش قلوب الغير…
15
ماملكش غير قلبي
وحياة وهبها لك
وإيدين بتعْلى للسما وتدعى.. ربنا يخليكى
ومافيش وطن ليا
ولا بيت أعيش جواه
وطني الوحيد حضنك
وبيتي هو عنيكي
ولا فيه بإيدي قرار
ولا حل ولا خيارات
أنا في إنتظار قدري
والإختيار ليكى…
16
ماسيبناش ذكرى للقصة
لكنا سيبنا تفاصيلها على الطرقات
على السكك اللي دابت من خطاوينا
وفوق الخد.. ودموعنا.. وفي المترو
ووسط حروف كتبنا منها دي الجوابات
أنا وإنتي قتلنا الذكرى جوانا
لكنا نسينا نمحيها
من الشجر اللي شايل لسه أسامينا
وقلب وسهم
وسيبنا الليل يبدل كام حقيقة بوهم
ونَسينا مشاعرنا.. مشاعرنا
بأول حضن في السيما
وأول بوسة مكسوفة تسيب خدك
وأول عيد بيحضرنا
ويبقى للفسح قيمة
كراسي دسوق.. وشط البحر والقلعة
وكام صورة على استانلي
ماتستني الـزمن ينسى يا بنت الإيه
يا فاكرة القلب مخزن للتراب والنار
وفاكرة القلب اوضة ودار
لأيام هيا اللي عاشتنا ومعشنهاش…
17
إمبارح..
أنا شفتك في الحلم
على إيدك بنت بتشبه لك
وبتحضني كف النونو بقلبك
وبتضحكي بشويش من فرحك
إمبارح..
أنا كنت فى حلم
وصحيت وأنا روحى بتنده لك…
18
أنا بسمعك
وإنتي بتاخدي من القصايد
اللي مكتوبة في عيونك
وتدندني قدام مرايتك..
“بعشقك”
وبتلضمي بغنوة لنجاة
“أنا بستناك وليلي شمعة سهرانة لليلة حب”
علشان مرايتك
قلبها يفضل مجمل
كل حته من ملامحك.. تسأليها
“مرايتى.. قولي لي يا مرايتى
حبيبى مجاش ليه دلوقتي”
أنا كنت واقف جنب منك بسمعك
لكني عارف إن بُكرة مكنش لينا
عشان كدا.. أول ما بيجيني الشتاء
بابقى كأني كنت لسه من يومين
تحت المطر
ماسك إيديكي.. بودعك…
19
الوقت رهان..
والساعة في إيدك كام دلوقت..؟
والليل لو طول من غيرك
مش يمكن تسرقنى الوحده
وتجينى براحتك تلاقينى..
على بُعدك عنى إتعودت
الساعة في إيدك كام يعنى..؟
ومعادنا مجاش على بالك لية
لو ينفع بُكرة يرجعنى
هاكتب لك نفس كلامى في شِعر
يمكن تفتكرى الوقت بجد.. وانتي بتقريه…
20
حُط حبرك ع الورق واكتب.. ألم
إكتب قصايد تتحرق
وإكتب غناوى.. تتركن
في الدرج عبى الذكريات
سيب الف معنى
بيجرى علشان.. يتسجن
في حضن بُكرة سيب.. كلام
سيب رسم ع الجدران.. يدوم
خطين بلونك يا علم
وإكتب حكاوى
تتنسى ويا الزمن
إكتب حِكم..
يفهما شبح الواد…
صاحبنا اللى إتقتل
واتسمى بإسمه شارعنا
بين الناس وبينه
لسه الشوارع ناقصة شهداء
مع إنها..
مفهاش كفن…
21
أدى كام سنة..
والأسئلة مترصصة وبتدارى عنى الأجوبة
في عنيكى مقريه الحكاية
لو جاية خايفه من الطريق
نبقى إتهزمنا في تجربة
ورميتى روحنا في وسط سكه بدون هدف
شوفى كام سنة ع البحر بنوشوش صدف
ونشهد الموج ع الوعود
ونرصها الأحلام ما بينا ونبنى م الرمل البيوت
فمتضعفيش.. وتخلى حبة ريح تهد اللى إتبني
فى الكام سنة…
21
عن إيد في وقت سلامها
بترتعش م الخوف
عن كل وهم بينتهى بكلمة
ظروف…
22
دورى معايا في قلبك
عن بواقى حنين لبعض
يمكن في وسط التوهه
يظهر لك طريق
فترجعينى للدفا
وتحققى من بين وعـودنا..
أهم وعد…
23
يا كل أحلامنا البريئة
يا كل ثانية بتتولد…
تخطف وراها العمر خطف
زى ما بتخطف دقيقة من دقيقة
يا قلب معجون بالأمل
العمر قصة
واللى مكتوب لك يادوب
هو الحقيقة…
24
البنت..
قعدة بتنتظر بُكرة
بُكرة اللى جاي
ولاغيها م الحسابات…
